ដោយ Steve Douglas AP Sports Writer

ប្រែសម្រួលជាខេមរភាសាដោយ ចុង ស៊ីវភីង

ក្រុងប៊ែរឡាំង (AP) - បញ្ចប់ការប្រកួតដែលក្រុមនេះគ្រប់គ្រងតាំងពីដើមដល់ចប់ អេស្ប៉ាញបានយកឈ្នះអង់គ្លេស ២-១ ក្នុងការប្រកួតវគ្គផ្តាច់ព្រ័ត្រនៃការប្រកួតបាល់ទាត់ពានរង្វាន់ទ្វីបអឺរ៉ុបកាលពីថ្ងៃអាទិត្យជាមួយ Mikel Oyarzabal ដែលជាអ្នកយកឈ្នះការប្រកួតដ៏មិនគួរឱ្យជឿនៅនាទីទី ៨៦។

Oyarzabal ដែលជាខ្សែប្រយុទ្ធបម្រុងដែលចូលមកជំនួសប្រធានក្រុម Alvaro Morata បានលើកបាល់ពីស្លាបខាងឆ្វេងរបស់ Marc Cucurella នៅពេលដែលការប្រកួតនៅកីឡដ្ឋាន Olympiastadion របស់ទីក្រុងប៊ែរឡាំង មើលទៅដូចជាបម្រុងនឹងបន្ថែមម៉ោងទៅហើយ។

ប្រទេសអង់គ្លេស ដែលជាកន្លែងកំណើតនៃបាល់ទាត់ នៅតែមិនទទួលបានពានធំក្នុងការប្រកួតបុរសណាមួយ ចាប់តាំងពីឈ្នះការប្រកួត World Cup ឆ្នាំ ១៩៦៦ ហើយកីឡាកររបស់ខ្លួនបានត្រឹមតែឈរមើលដោយសោកសៅ ខណៈដែល Morata បានលើកពានយ៉ាងមានមោទនភាពនៅកីឡដ្ឋានដែលសាងសង់សម្រាប់កីឡាអូឡាំពិកកាលពីឆ្នាំ ១៩៣៦នេះ។

ងាកមកអេស្ប៉ាញវិញ ការឈ្នះក្នុងឆ្នាំ ២០២៤ នេះ គឺជាពានបន្ថែមមួយទៀតទៅលើជ័យជំនះកាលពីឆ្នាំ ១៩៦៤, ២០០៨ និង ២០១២។

«យើងនៅទីនេះ ជើងឯកអឺរ៉ុប» នេះជាសម្តីរបស់ Nico Williams ដែលជាអ្នកស៊ុតបញ្ចូលគ្រាប់បាល់បើកឆាកសម្រាប់អេស្ប៉ាញនៅនាទីទី ៤៧ និងត្រូវតាមទាន់ដោយកីឡាករបម្រុងរបស់អង់គ្លេស Cole Palmer នៅនាទីទី ៧៣។ គាត់បានបន្តថា៖ «យើង​រំភើប​ចិត្ត ហើយ​សង្ឃឹម​ថា​ជោគជ័យនេះនឹង​អាច​បន្តដល់ World Cup 2026»។

Lamine Yamal ដែលជាកីឡាករឆ្នើមដែលមានវ័យ ១៧ ឆ្នាំ និងជាកីឡាករក្មេងបំផុតដែលបានបង្ហាញខ្លួននៅក្នុងការប្រកួតជើងឯកទ្វីបអឺរ៉ុប បានបង្កើតឱកាសឱ្យគ្រាប់បាល់របស់ Williams ជាមួយនឹងការរត់ខាងក្នុងមុនពេលបញ្ជូនបាល់កាត់មុខតំបន់នោះ។ ខ្សែបម្រើស្លាបទាំងពីរបានក្លាយជាជើងឯកវ័យក្មេងនៃក្រុមចម្រុះវប្បធម៌ដ៏គួរឱ្យរំភើប ដែលឆ្លុះបញ្ចាំងពីការផ្លាស់ប្តូរប្រជាសាស្រ្តរបស់ប្រទេសអេស្ប៉ាញ។

ម្តាយរបស់ Yamal មកពី Equatorial Guinea ហើយឪពុករបស់គាត់មកពី Morocco ខណៈដែល Williams ក្នុងវ័យ ២២ ឆ្នាំមានឪពុកម្តាយជនជាតិហ្គាណា ដែលបានធ្វើដំណើរដ៏វែងឆ្ងាយទៅកាន់ទ្វីបអឺរ៉ុបដើម្បីកែប្រែជីវិតឱ្យកាន់តែប្រសើរ។ ដើម្បីទៅដល់ប្រទេសអេស្ប៉ាញ ពួកគេត្រូវជិះឡានផ្នែកខាងក្រោយ ដែលផ្ទុកមនុស្សជាច្រើន ហើយដើរដោយជើងទទេរឆ្លងកាត់វាលខ្សាច់សាហារ៉ា។

កីឡាករ Williams ដែលជាកីឡាករឆ្នើមនៃការប្រកួតជាមួយនឹងការរត់ផ្លោង និងគ្រាប់បាល់ទីពីររបស់គាត់ក្នុង Euro 2024 បាននិយាយថា៖ «ខ្ញុំជឿថា ប្រវត្តិសាស្ត្រមានការផ្លាស់ប្តូរ ហើយយើងពិតជាដឹងគុណជាខ្លាំង»។

គាត់បាននិយាយថា៖ «ឪពុកម្តាយរបស់ខ្ញុំបានឆ្លងកាត់រឿងជាច្រើនដើម្បីបានមកដល់ទីនេះ។ ពួកគេគឺជាអ្នកដែលបានរងទុក្ខបំផុត ហើយពួកគេជាបុគ្គលដែលបានបណ្តុះនូវការគោរព និងភក្ដីភាពបែបនេះដល់ខ្ញុំ។ ខ្ញុំ​ពិត​ជា​សប្បាយ​ចិត្ត​ព្រោះ​យើង​កំពុង​បង្កើត​ប្រវត្តិសាស្ត្រ»។

មិនដូចបងប្រុសរបស់គាត់ Inaki ដែលជាកីឡាករអន្តរជាតិរបស់ហ្គាណា Nico បានជ្រើសរើសលេងឱ្យអេស្ប៉ាញ ហើយឥឡូវនេះនឹងត្រូវបានចាត់ទុកថាជាវីរបុរសជាតិនៅទីនោះផងដែរ។

អេស្ប៉ាញបានត្រលប់មកវិញក្នុងនាមជាកីឡាករសំខាន់ក្នុងបាល់ទាត់ជាន់ខ្ពស់ បន្ទាប់ពីយកឈ្នះទាំងការប្រកួតបាល់ទាត់ពិភពលោកស្ត្រី លើអង់គ្លេសដូចគ្នា និង UEFA Nations League ផ្នែកបុរសនៅឆ្នាំ ២០២៣ ។

ចាប់តាំងពីឆ្នាំ ២០០១ ក្រុមបុរសរបស់អេស្ប៉ាញបានឈ្នះការប្រកួតវគ្គផ្តាច់ព្រ័ត្រសំខាន់ៗចំនួន ២៣ ជាប់ៗគ្នានៅក្នុងក្លឹប និងបាល់ទាត់អន្តរជាតិ។

Williams បាន​និយាយ​ថា​៖ «​ខ្ញុំ​បាន​និយាយ​មុន​ការ​ប្រកួត​ថា គ្មាន​នរណា​ម្នាក់​អាច​ផ្តួលពួក​យើង​បាន​ទេ»​។

អេស្ប៉ាញបានឈ្នះការប្រកួតទាំងប្រាំពីរនៅក្នុងការប្រកួតជើងឯកអឺរ៉ុបនេះ ដែលជាស្នាដៃដែលមិនធ្លាប់មានពីមុនមក ហើយបានបំបែកកំណត់ត្រាសម្រាប់ការស៊ុតបញ្ចូលទីក្នុងមួយប្រកួត ដោយរកបាន១៥គ្រាប់។

បន្ទាប់​ពី​ការ​ផ្លុំកញ្ចែ​ចុង​ក្រោយបញ្ចប់ការប្រកួត ​ឈុត​ឆាក​ដ៏​រីករាយមួយកើតឡើង ​ដោយ​ខ្សែ​ការពារ Dani Carvajal ត្រូវបាន​បោះឡើងលើ​ដោយ​មិត្ត​រួម​ក្រុម​ បន្ទាប់​ពី​ដួល​ទៅ​នឹង​ដី។ គ្រូបង្វឹកសញ្ជាតិអេស្ប៉ាញ Luis de la Fuente ក៏ត្រូវបានកីឡាកររបស់គាត់បោះឡើងដើម្បីអបអរផងដែរ។ ទាំង Cucurella និង Yamal បាននាំកីឡាកររបស់អេស្ប៉ាញដទៃ លោតពីលើផ្ទាំងផ្សាយពាណិជ្ជកម្ម ដើម្បីទៅជិតអ្នកគាំទ្រអេស្ប៉ាញដែលពាក់អាវក្រហម និងលឿងឈរអបអរ នៅចុងខាងកើតនៃកីឡដ្ឋានផងដែរ។

Yamal បាននិយាយថា៖ «នេះគឺជាអំណោយ (ថ្ងៃកំណើត) ដ៏ល្អបំផុត ដែលខ្ញុំអាចសុំបាន»។ «វាគឺជាសុបិនដែលក្លាយជាការពិត»។

បន្ទាប់ពីទទួលបានមេដាយហើយ កីឡាករវ័យក្មេងរូបនេះ បានងាកមកលើកដៃឡើង លានអណ្តាត និងបង្ហាញស្នាមញញឹមដ៏គួរឱ្យអស់សំណើចជាការអបអរ។ នៅពេលនោះ Yamal និងមិត្តរួមក្រុមរបស់គាត់បានពាក់អាវអេស្ប៉ាញដែលមានសរសេរថា «ស្តេចនៃអឺរ៉ុប« និងលេខ ៤ នៅខាងក្រោយ។

ទន្ទឹមនឹងនេះ អ្នកគាំទ្រដែលបានទស្សនាការប្រកួតនៅលើអេក្រង់ធំមួយក្នុងទីក្រុង Madrid បានអបអរសាទរយ៉ាងគគ្រឹកគគ្រេង ដោយស្រែកថា «ជើងឯក ជើងឯក» ជាភាសាអេស្ប៉ាញ។ វា​ជា​ថ្ងៃ​កីឡា​ដ៏​អស្ចារ្យ​សម្រាប់​ប្រទេស​ជាតិនេះ ដោយ​កីឡាករ Carlos Alcaraz បាន​ឈ្នះ​ពាន​រង្វាន់​ឯកត្តជន​បុរស Wimbledon រយៈ​ពេល​ពីរឆ្នាំជាប់​គ្នា​ ប៉ុន្មានម៉ោងមុន​ការ​ប្រកួត Euro 2024 វគ្គ​ផ្តាច់ព្រ័ត្រចាប់ផ្តើម។

សម្រាប់ក្រុមបាល់ទាត់ជម្រើសជាតិអង់គ្លេសវិញ ពេលនេះក្រុមបុរសនេះ បានចាញ់ការប្រកួតវគ្គផ្តាច់ព្រ័ត្រ Euro ម្តងរួចមកហើយ ដែលវាត្រូវបានចាញ់ដោយការស៊ុតបាល់ប៉េណាល់ទីដោយក្រុមអ៊ីតាលីនៅលើទឹកដីរបស់ខ្លួនក្នុងវគ្គផ្តាច់ព្រ័ត្រក្នុងឆ្នាំ ២០២១ ហើយនេះគឺជាការចាញ់ដ៏ឈឺចាប់មួយទៀតសម្រាប់ក្រុមនេះ ដែលគិតទៅដល់​ World Cup បន្ទាប់ វានឹងឈានទៅដល់ ៦ទសវត្សរ៍​ដែល​អង់គ្លេសមិនទទួលបាន​ពាន​ធំ​ណាមួយសោះ។

ទោះបីជាយ៉ាងណាក៏ដោយ ក្រុមស្រីរបស់អង់គ្លេសបានទទួលជោគជ័យច្រើនជាង ដោយការឈ្នះជើងឯកទ្វីបអឺរ៉ុបនៅឆ្នាំ ២០២១ និងឈានដល់វគ្គផ្តាច់ព្រ័ត្រ World Cup ពីរឆ្នាំក្រោយមក។

ព្រះអង្គម្ចាស់ William ដែល​បាន​ចូលរួមទស្សនា​វគ្គ​ផ្តាច់ព្រ័ត្រ​ជាមួយ​ឥស្សរជន​ផ្សេងទៀត​រួមទាំង​ស្តេច​អេ​ស្ប៉ា​ញ Felipe បាន​សរសេរ​នៅលើ​បណ្តាញ​សង្គម​ថា៖ «​លើក​នេះ ​វា​គ្រាន់តែមិនទាន់ដល់ពេល។​ យើងទាំងអស់គ្នានៅតែមានមោទនភាពចំពោះអ្នក»។

វា​ជា​ការ​ប្រកួតលើក​ទី​បួន​ជាប់​គ្នា​ដែល​អង់គ្លេស​បានប្រកួត​ចាប់​តាំង​ពី​វគ្គ​ចែក​ពូល ប៉ុន្តែ​ភាព​តស៊ូរបស់​ពួក​គេនៅតែ​មិន​បាន​ទទួល​បានលទ្ធផល​។

ក្រុមមួយដែលបានដែលធ្លាប់តែកែប្រែស្ថានការណ៍នៅវេលាសំខាន់ៗនៅក្នុង Euro 2024 រួមមានទាំងការទាត់លើក្បាលរបស់ Jude Bellingham នៅនាទីទី ៩៥ ពេលប៉ះនឹង Slovakia ក្នុងវគ្គជម្រុះ១៦ក្រុម បែរជាមិនអាចបញ្ជូនបាល់មួយគ្រាប់ទៀតបាន ដោយខ្សែបម្រើអេស្ប៉ាញ Dani Olmo បានទាត់បាល់ចេញពីបន្ទាត់ នៅបាល់​ជ្រុង​នៅ​នាទីទី ​៨៩។

ប្រធានក្រុមជម្រើសជាតិអង់គ្លេស Harry Kane បាននិយាយថា៖ «វាជាដំណើរដ៏លំបាកមួយ យើងធ្វើបានល្អណាស់ទម្រាំបានមកដល់ទីនេះ ប៉ុន្តែនៅទីបំផុតយើងគង់នឹងត្រូវបានគេវិនិច្ឆ័យលើការប្រកួតនេះដដែល»។

លោក​បាន​បន្ថែម​ថា​៖ «​វា​ពិតជា​ឈឺចាប់​ខ្លាំង​ណាស់​ ហើយ​វា​នឹង​នៅឈឺ​យូរ​ទៀត»។

គ្រូបង្វឹកជម្រើសជាតិអង់គ្លេសលោក Gareth Southgate ដែលបានកាន់តំណែងរយៈពេល ៨ ឆ្នាំ និងបានដឹកនាំក្រុមទៅកាន់វគ្គពាក់កណ្តាលផ្តាច់ព្រ័ត្រ World Cup ឆ្នាំ ២០១៨ បាននិយាយថា វាមិនមែនជាពេលវេលាដើម្បីធ្វើការសម្រេចចិត្តលើអនាគតរបស់គាត់នោះទេ។ គួរបញ្ជាក់ថា កិច្ចសន្យារបស់គាត់នឹងផុតកំណត់នៅខែធ្នូ។

លោក Southgate បាននិយាយថា៖ «កីឡាករភាគច្រើននៃក្រុមនេះនឹងនៅលេងបន្ត មិនត្រឹមតែសម្រាប់ការប្រកួត World Cup ប៉ុណ្ណោះទេ ថែមទាំងនៅដល់ Euro បន្ទាប់ផងដែរ។ មានរឿងជាច្រើនដែលត្រូវទន្ទឹងរង់ចាំ ប៉ុន្តែនៅពេលនេះ វាមិនមែនជាការលួងលោមទេ»។