ប្រែសម្រួលជាខេមរភាសាដោយ ចុង ស៊ីវភីង

លោក ជា ចាន់ថា ប្រធានសមាគមប្រជា​ធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) ត្រូវបានសាលាដំបូងខេត្តស្វាយរៀង បញ្ជូនទៅឃុំខ្លួនបណ្តោះអាសន្ននៅល្ងាចថ្ងៃសុក្រ បន្ទាប់ពីចាប់ខ្លួនកាលពីថ្ងៃទី១៦ ខែកក្កដា ដោយពេលនោះលោកកំពុងតែចុះផ្សព្វផ្សាយដល់ប្រជាពលរដ្ឋអំពីការទទួលអត្ថប្រយោជន៍ពី របបសន្តិសុខសង្គម (ប.ស.ស)។

នៅថ្ងៃដែលលោកត្រូវបានគេឃាត់ខ្លួន លោក ចាន់ថា បានចូលរួមសិក្ខាសាលាស្តីពីការប្រែប្រួលអាកាសធាតុ និងកិច្ចគាំពារសង្គមនៅក្រុងបាវិត ខេត្តស្វាយរៀង ដោយបានជួបជាមួយនឹងនិយោជិក និងនិយាយអំពីការប្រើប្រាស់ ប.ស.ស ដែលជាសេវាសង្គមរបស់រដ្ឋាភិបាល។

បន្ទាប់ពីត្រូវបាននគរបាលឃុំខ្លួនរយៈពេលពីរថ្ងៃ លោក ចាន់ថា បានចូលខ្លួនមកបំភ្លឺនៅតុលាការដើម្បីសាកសួរនៅថ្ងៃទី១៨ ខែកក្កដា ហើយបានចោទប្រកាន់នៅថ្ងៃបន្ទាប់តាមមាត្រា ៣៧៧ និង ៣៧៨ នៃក្រមព្រហ្មទណ្ឌពីបទឆបោកក៏ដូចជាមាត្រា ៦១០ ពីបទ «ធ្វើសកម្មភាពបង្កឱ្យមានការយល់ច្រឡំជាមួយការបំពេញមុខងារសាធារណៈ»។ ប្រសិន​បើ​ត្រូវ​បាន​កាត់​ទោស លោក ចាន់ថា អាច​ប្រឈម​នឹង​ការ​ជាប់​ពន្ធនាគារ​រហូត​ដល់​ទៅ ៣ ឆ្នាំ។

IDEA ធ្វើការជាមួយអ្នកប្រកបរបរក្នុងសេដ្ឋកិច្ចក្រៅប្រព័ន្ធ និងផ្សព្វផ្សាយលើកកម្ពស់ការរស់នៅ និងលក្ខខណ្ឌការងារឱ្យកាន់តែប្រសើរឡើង រួមទាំងកែលម្អលទ្ធភាពទទួលបានសេវារដ្ឋាភិបាល។ សមាគមនេះក៏បានផ្សព្វផ្សាយព័ត៌មានអំពីការចុះឈ្មោះ និងការទទួលបានអត្ថប្រយោជន៍ពី ប.ស.ស ផងដែរ។ ប.ស.ស គឺជាកម្មវិធីដែលគ្រប់គ្រងដោយរដ្ឋាភិបាលដែលធានាដល់កម្មករនិយោជិតទាំងអស់ឱ្យទទួលបាននូវសេវាសុខភាព និងអត្ថប្រយោជន៍សម្រាប់ជនមានពិការភាពផងដែរ។

លោក វន់ ពៅ ប្រធានរបស់ IDEA បានប្រាប់ គិរីផូសថាពួកគេបានទទួលការរាយការណ៍អំពីករណីនេះ ដោយបន្ថែមថា លោក ចាន់ថា គឺជាសមាជិកនៃអង្គការនេះ។ លោកបានចូលរួមក្នុងការផ្សព្វផ្សាយនូវការប្រើប្រាស់ ប.ស.ស ដល់ប្រជាពលរដ្ឋធ្វើការក្នុងវិស័យសេដ្ឋកិច្ចក្រៅប្រព័ន្ធ ហើយបញ្ជាក់ថាកម្មវិធីនេះជាផលប្រយោជន៍សាធារណៈ។

«ខ្ញុំគិតថា ចាន់ថា មិនបានបំពានច្បាប់ក្រោមមាត្រាទាំងបីទេ ពីព្រោះយោងតាមបេសកកម្មរបស់ IDEA យើងចង់បង្កើនសមាជិក និងពន្យល់ពួកគេពីមូលហេតុដែលពួកគេគួរចុះឈ្មោះសម្រាប់របបសន្តិសុខសង្គម។ ម្យ៉ាងទៀត សកម្មភាពទាំងនេះគឺស្របតាមមូលដ្ឋានសមស្របនៃរបបសន្តិសុខសង្គម និងក្រសួងការងារ និងបណ្តុះបណ្តាលវិជ្ជាជីវៈ (MLVT)»។

ដើម្បីជួយសម្រួល និងដោះស្រាយបញ្ហានេះ ប្រធាន IDEA បានបញ្ជាក់ថា លោកបានទាក់ទងមេធាវី និងមន្ត្រីរដ្ឋាភិបាល ដែលធ្វើការផ្នែកច្បាប់រួចរាល់ហើយ។ IDEA ក៏នឹងស្នើសុំកិច្ចប្រជុំ និងពិភាក្សាជាមួយភាគីសំខាន់ៗផ្សេងទៀត រួមមានក្រសួងមហាផ្ទៃ ប.ស.ស និងអាជ្ញាធរខេត្តស្វាយរៀង។

លោក​បាន​ថ្លែង​ថា​៖ «​យើង​នឹង​ជួប​ពិភាក្សា​ជាមួយ​ភាគីពាក់ព័ន្ធនានា ហើយ​ខ្ញុំ​សង្ឃឹម​ថា​តុលាការ​នឹង​ពិចារណា​ទម្លាក់​ការចោទ​ប្រកាន់នេះ និង​ដោះលែង​គាត់​ឱ្យមានសេរីភាព»។

​លោក កត្តា អ៊ន អ្នក​នាំ​ពាក្យនៃក្រសួងការងារ និងបណ្តុះបណ្តាលវិជ្ជាជីវៈ បាន​ឱ្យដឹងថា ករណី​នេះ​ស្ថិត​នៅ​ក្នុង​ការដោះស្រាយនៃ​សមត្ថកិច្ច​របស់​តុលាការ មិន​មែនរបស់ក្រសួងការងារនោះទេ។

លោក ហេង សុផាន់ណារិទ្ធ នាយករងបេឡាជាតិរបបសន្តិសុខសង្គមបានបដិសេធមិនធ្វើការអត្ថាធិប្បាយលើរឿងនេះទេ។

ជាមួយគ្នានេះ លោក អំ សំអាត ប្រធានប្រតិបត្តិការនៃអង្គការលីកាដូ មានប្រសាសន៍ថា សមាជិក IDEA កំពុងផ្សព្វផ្សាយបញ្ហាផលប្រយោជន៍សាធារណៈទាក់ទងនឹងការការពារសង្គម ប.ស.ស និងការប្រែប្រួលអាកាសធាតុ។ សកម្មភាព​ទាំង​នោះ​មិន​ត្រូវ​បាន​ចាត់​ទុក​ថា​ជា​ការ​បំពាន​ច្បាប់​នោះ​ទេ។

លោកបានបញ្ជាក់ថា៖ «​ប្រសិន​បើ​បុគ្គលដែលនិយាយពាក់ព័ន្ធនឹង​ប្រធានបទ​នេះ​ត្រូវ​ចាប់​ខ្លួន វា​ជាការបំពានលើ​សិទ្ធិ​បញ្ចេញ​មតិ​របស់​ពួកគេ។ អ៊ីចឹង​អង្គការ​លីកាដូ​កំពុង​តាម​ដាន​យ៉ាង​ដិតដល់លើរឿងនេះ ហើយ​បើ​មាន​សំណើ​សុំ​ជំនួយ យើង​ក៏​នឹង​ពិចារណា​ដែរ ដោយ​ផ្អែក​លើ​ច្បាប់»។

ព្រះរាជអាជ្ញារងអមសាលាដំបូងខេត្តស្វាយរៀង លោក ឈីវ អ៊ិចគង់ មានប្រសាសន៍ថា៖ «យើងបានបញ្ជូនសំណុំរឿងនេះទៅចៅក្រមស៊ើបសួរ ខណៈដែលជននោះត្រូវបានចាប់ខ្លួនតាមមាត្រា ៣៧៧ និង ៣៧៨ ពីបទឆបោក និងមាត្រា ៦១០»។

លោក​បាន​ស្នើ​ឱ្យ ​គិរីផូស ​​សាកសួរ​ព័ត៌មាន​បន្ថែម​ពី​លោក ទេព ផល្លា ប្រធាន​តុលាការ​ខេត្ត​ស្វាយរៀង។ យ៉ាងណាមិញ លោក​មិន​បាន​ឆ្លើយ​តប​នោះទេ គិតមកដល់ពេលចុះ​ផ្សាយ​នេះ៕