ដោយ ជាង សុផេង Associated Press

ប្រែសម្រួលជាខេមរភាសាដោយ សេង ម៉េងហេង

ភូមិបឹង ប្រទេសកម្ពុជា (AP) — ដែលគេស្គាល់ជាភាសាខ្មែរថា "ហែរអ្នកតា" ពិធីនេះត្រូវបានប្រារព្ធឡើង នៅក្នុងភូមិបឹងប្រហែល ២៥ គីឡូម៉ែត្រ (១៦ ម៉ាយ) ភាគពាយព្យនៃរាជធានីភ្នំពេញ។ បុរសវ័យក្មេងបានគូរពណ៌នៅលើមុខពីរឿងព្រេងនិទាន និងដងខ្លួនរបស់ពួកគេ ហើយ ស្លៀកពាក់ជាទម្រង់ផ្សេងៗ និងស្លៀកសំពត់ធ្វើពីស្មៅ ខណៈដែលស្ត្រីវ័យក្មេងស្លៀកពាក់ប្រពៃណី។

ប្រជាជនកម្ពុជាភាគច្រើនជាពុទ្ធសាសនិក ប៉ុន្តែក៏មានប្រជាជនខ្លះទៀត មានជំនឿលើវិញ្ញាណអារុក្ខអារក្សអ្នកតាផងដែរ ដោយអ្នកទាំងនោះជំនឿជឿថា វិញ្ញាណអាចរស់នៅបានគ្រប់ប្រភេទនៃវត្ថុមានជីវិត និងគ្មានជីវិត។

ពិធី​ដែល​គេ​ប្រារព្ធ​ធ្វើ​ជា​រៀង​រាល់​ឆ្នាំ​នៅ​ដើម​រដូវ​វស្សា ​មាន​ការ​ប្រារព្ធទាំងពី​នៅ​សម័យ​បុរាណមកម្លេះ ប៉ុន្តែ​ឥឡូវ​កម្រ​មាន​អ្នកប្រាព្ធពិធីនេះណាស់ តែទោះបីជាយ៉ាងណាក៏ដោយ ភូមិ​បឹង​បាន​ប្រារព្ធ​ពិធី​នេះ​ជា​ច្រើន​រយ​ឆ្នាំ​មក​ហើយមកដល់បច្ចុប្បន្ន។

លោក សែម ប៉ុម អាយុ ៣៥ឆ្នាំ បាននិយាយថា «ពិធីនេះត្រូវបានធ្វើឡើងជារៀងរាល់ឆ្នាំតាំងពីខ្ញុំកើតមក។»

អ្នកភូមិទាំងចាស់ទាំងក្មេង ប្រមូលផ្តុំគ្នាប្រហែល ៣ គីឡូម៉ែត្រ (១.៨ ម៉ាយ) ពីអាស្រមអារក្សអ្នកតា។ ដោយមានការប្រគុំភ្លេងប្រពៃណី ក្រុមខ្លះដើរ អ្នកខ្លះជិះសេះទៅកន្លែងនោះ។

នៅឯទីសក្ការៈ អ្នកភូមិបានអុជធូប និងប្រគេនផ្លែឈើ អាហារ ភេសជ្ជៈ និងស្រាសរ ជាច្រើនមុខ ព្រមទាំងបួងសួងសុំសេចក្តីសុខ ទឹកភ្លៀង ភាពចម្រុងចម្រើន និងការពារជំងឺនានាមកលើសហគមន៍ទាំងមូល។ ពិធី​បញ្ចប់នៅពាក់កណ្តាល​ថ្ងៃ​​ដោយ​ការ​ប្រស់​ទឹក​មន្ដ​ដល់​អ្នកចូលរួម​ទាំងអស់គ្នា។

លោក ម៉េត សុខគ្រី ជាងដែក អាយុ៣០ឆ្នាំ ដែលលាបមុខ និងដងខ្លួន ដូចវិញ្ញាណ និងគ្រោងសម្លៀកបំពាក់ដោយស្លឹកឈើ បាននិយាយថា គាត់សុំពេលសម្រាកពីការងារ ដើម្បីប្រារព្ធពិធីនេះ។

លោក សុខគ្រី បាននិយាយថា «នៅពេលខ្ញុំសុំឈប់សម្រាកពីមេ ខ្ញុំបានប្រាប់គាត់ថា ពិធីថ្ងៃនេះមានសារៈសំខាន់សម្រាប់ខ្ញុំ ដូច្នេះទោះបីជាគាត់មិនអនុញ្ញាតឲ្យខ្ញុំឈប់សម្រាកក៏ដោយ ក៏ខ្ញុំឈប់សម្រាកដែរ។»

ប្រទេសកម្ពុជាពឹងផ្អែកយ៉ាងខ្លាំងលើវិស័យកសិកម្ម នេសាទ និងព្រៃឈើ ហើយប្រជាជនកម្ពុជាជាង ៦០ ភាគរយ រស់នៅជនបទ។ ពិធី​នេះ​ត្រូវ​នឹង​រដូវ​មូសុង​ ខណៈ​ដែល​កសិករ​រៀបចំ​សម្រាប់​ការ​ដាំ​ស្រូវ ដែល​ជា​ដំណាំ​មួយ​ ក្នុង​ចំណោម​ដំណាំ​ដែល​ប្រើ​ទឹក​ខ្លាំង​បំផុត។

យោងតាមសហព័ន្ធស្រូវអង្ករកម្ពុជា ប្រទេសកម្ពុជាបាននាំចេញអង្ករជាង ៦៥៦.០០០ តោនកាលពីឆ្នាំមុន កើនឡើង ៣ ភាគរយ ពីឆ្នាំ ២០២២។