ប្រែសម្រួលជាខេមរភាសាដោយ សាន សុម៉ានីតា

ប្រជាជនជិត ៨០០ នាក់បានស្លាប់ ដោយសារគ្រោះថ្នាក់ចរាចរណ៍នៅក្នុងឆមាសទីមួយនៃឆ្នាំ ២០២៤នេះ ដោយអាជ្ញាធរបានសន្យាថានឹងពង្រឹងច្បាប់ចរាចរណ៍ដើម្បីកាត់បន្ថយចំនួនអ្នកស្លាប់ដោយសារគ្រោះថ្នាក់ចរាចរណ៍នៅពាក់ត្រឹមកណ្តាលឆ្នាំ ២០៣០ ។

យោងតាមរបាយការណ៍របស់ក្រសួងមហាផ្ទៃ ចំនួនគ្រោះថ្នាក់ចរាចរណ៍ដែលបានកត់ត្រាសរុបមានចំនួន ១៥២០ករណី ក្នុងរយៈពេលប្រាំមួយខែដំបូងនៃឆ្នាំនេះ ពោលគឺធ្លាក់ចុះ១ភាគរយ បើធៀបទៅនឹងអំឡុងពេលដូចគ្នាកាលពីឆ្នាំ ២០២៣។ ប៉ុន្តែចំនួនអ្នកស្លាប់បានកើនឡើង ៥ ភាគរយ ពីចំនួន ៧៩៣ នាក់នៅចន្លោះខែមករាដល់ខែមិថុនានៅឆ្នាំ ២០២៣។

នៅក្នុងរបាយ​ការណ៍ដដែល​ក៏បាន​បន្ថែមទៀត​ថា ក្នុង​ចំណោម​គ្រោះ​ថ្នាក់​ចរាចរណ៍​ចំនួន ១៥២០​លើក មាន​មនុស្ស​ចំនួន ២១១៦​​នាក់​បាន​រង​របួស ហើយ៧៥​ភាគរយនៃចំនួនសរុប ​នៃ​គ្រោះថ្នាក់​គឺបណ្ដាល​មកពី​អ្នកបើកបរ​ម៉ូតូ​។ បើគិតត្រឹមខែកុម្ភៈឆ្នាំ២០២៤ ចំនួនយានយន្តដែលបានចុះបញ្ជីមានចំនួន ៧៣៥១៩០៦ គ្រឿង ក្នុងនោះ ៦២៤៤០៩៦ គឺជាម៉ូតូ។

ក្នុងរបាយការណ៍​នេះ​បាន​និយាយ​ថា​៖ «​វា​បាន​បន្សល់​ទុកនូវ​សោកនាដកម្ម និង​បន្ទុក​ជាច្រើន​ដល់​គ្រួសាររបស់អ្នកស្លាប់ និង​សង្គម​»​។

កាលពីថ្ងៃទី១៧ ខែកក្កដានេះ រដ្ឋមន្ត្រីក្រសួងមហាផ្ទៃ និងក្រសួងពាក់ព័ន្ធផ្សេងទៀត បានប្តេជ្ញារៀបចំសេចក្តីព្រាងច្បាប់ថ្មី ស្តីពីចរាចរណ៍ផ្លូវគោក ដើម្បីបន្ថែមមាត្រាដែលពង្រឹងច្បាប់ ដើម្បីកាត់បន្ថយគ្រោះថ្នាក់ចរាចរណ៍ឱ្យបាន ៥០ភាគរយ នៅក្នុងឆ្នាំ២០៣០។

ដោយការរៀបចំសេចក្តីព្រាងច្បាប់ថ្មីនេះ នឹងស្របទៅតាមវឌ្ឍនភាពរបស់កម្ពុជា និងជួយរួមចំណែកក្នុងការទប់ស្កាត់ និងកាត់បន្ថយគ្រោះថ្នាក់ចរាចរណ៍ផ្លូវគោក ទន្ទឹមនឹងការចូលរួមក្នុងការអនុវត្តផែនការសុវត្ថិភាពចរាចរណ៍ផ្លូវគោកសកលដោយអង្គការសហប្រជាជាតិ ដើម្បីកាត់បន្ថយចំនួនអ្នករបួស និងអ្នកស្លាប់។

លោក គង់ រតនៈ អ្នកជំនាញ​សុវត្ថិភាព​ចរាចរណ៍​បាន​កត់​សម្គាល់ថា ទោះបីជា​គ្រោះថ្នាក់​ចរាចរណ៍​មាន​ការថយចុះ​ក៏ដោយ ក៏​បញ្ហានេះ​នៅតែ​ជា​រឿងដ៏គួរឱ្យបារម្ភ។ លោក​បានបន្ថែមទៀត​ថា ជា​មធ្យម​មនុស្ស​ពី ៤ ទៅ ៥ នាក់​បាន​ស្លាប់​ក្នុង​មួយ​ថ្ងៃ​ដោយ​គ្រោះថ្នាក់​ចរាចរណ៍។ ទោះជាយ៉ាងនេះក្តី លោកក៏បានកត់សម្គាល់ថា នេះជាការថយចុះ បើធៀបទៅនឹងកាលពី១០ឆ្នាំមុន ដែលជាមធ្យមមានពី៥ទៅ៦នាក់ក្នុងមួយថ្ងៃ។

លោកក៏បាននិយាយទៀតថា៖«ទោះបីជាមាន​ការ​ថយ​ចុះ​បន្តិចមែន ប៉ុន្តែ​បើ​ធៀបទៅ​នឹង​អ្វី​ដែល​យើង​ចង់​បាន គឺយើងនៅមិនទាន់ទទួលបាននៅ​ឡើយ​ទេ ព្រោះចំពោះខ្ញុំ នេះនៅតែជាបញ្ហ ដូច្នេះប្រជាជនគ្រប់រូបគួរតែយកចិត្តទុកដាក់ចំពោះបញ្ហានេះ។ ហើយការបាត់បង់អាយុជីវិតរបស់ប្រជាពលរដ្ឋនៅតាមដងផ្លូវ គឺជារឿងដែលមិនគួរកើតឡើង ព្រោះវាជារឿងដែលយើងអាចទប់ស្កាត់បាន ប៉ុន្តែក៏ទាមទារឲ្យប្រជាពលរដ្ឋគោរពច្បាប់ឲ្យបានត្រឹមត្រូវផងដែរ ដើម្បីកាត់បន្ថយវា»។

«លើសពីនេះ យើងជាប្រទេសមួយដែលមានច្បាប់ ដូច្នេះយើងទាមទារឱ្យប្រជាជនគ្រប់រូបគោរពច្បាប់ ដើម្បីដោះស្រាយនៅពេលដែលយើងមានបញ្ហា ប៉ុន្តែ​បើ​សួរ​ខ្ញុំថា តើ​ការ​អនុវត្ត​ច្បាប់​មាន​ប្រសិទ្ធភាព​ក្នុង​ការ​កាត់​បន្ថយ​គ្រោះថ្នាក់​ចរាចរណ៍​ឬ​អត់?»។

លោក រតនៈ បន្ថែមថា វាគឺជា​គន្លឹះ​ដែល​សាធារណជន​ត្រូវតែគោរព​ច្បាប់ និង​ច្បាប់​ចរាចរណ៍ ហើយចូល​រួមចំណែក​ទាំងអស់គ្នា ដើម្បីកាត់បន្ថយ​គ្រោះថ្នាក់​ចរាចរណ៍៕